Friday, February 26, 2016

حاوريني يا كيكة

-يا ابني ماينفعش تاخد ايات القران وتفسرها كدة لوحدها.
-أمال اعمل ايه؟
-لازم ترجع لظروف نزول الاية وأسباب النزول مش كل الايات نزلت عامة ويجب ان نعمل بيها.
-امال بنقراها ليه لحد انهاردة طالما مالهاش لازمة؟ وبعدين انت تقصد ان القران لوحده بدون السنة وأسباب النزول غير كافي؟
-ايوا طبعا لازم ترجع لأسباب النزول.
-يعني القران كتاب ناقص ولا لم يترك كبيرة ولاصغيرة.وهل هو كتاب مبهم ام واضح؟
-طبعا القران كتاب كامل ولم يترك كبيرة ولا صغيرة وهو واضح غير مبهم. بس لازم نرجع لصحيح السنة في تفسيره.
-ماشي كلامك.طيب بتعرف منين الايات اللي بتنزل لسبب نزول ويجب العمل بها والايات اللي بسبب نزول بس لايعمل بها؟ولو اية نزلت لسبب ما ولا يجب ان نعمل بها وجه سبب مشابه او مطابق لسبب نزولها بنعمل بيها ولا لا؟
-بص الحتة دي مش متأكد منها وانا مش ضليع اوي في الدين بصراحة.
- تمام وانت بقى موافق على كل الصحيح من السنة والمتفق عليه ولا حاجات وحاجات؟
-فيه حاجات طبعا مابصدقهاش وحاجات غير منطقية.
-يعني انت بتصحح القران او بتنسخه بالسنة اللي انت اصلا شاكك فيها او مش متأكد انها صحيحة 100%؟
-الحاجات دي بتتحس بتقدر تقول الحديث ده مدسوس او حقيقي بما يتفق مع منطقك وتفكيرك.
-وطالما هو بيتحس كدة العلماء اتفقوا عليه ليه ولا هم ماعندهمش حس زيك؟ وبعدين مش شايف انه اهمال الهي انه ينزل كتاب يحتاج للسنة معاه لشرحه ومعرفة المراد منه ويسمح ان العبث والتزوير يوصلوا للسنة اللي هي بحسب كلامك لاغنى عنها لفهم القران؟
-لأ طبعا مش عبث.
-يعني انت مش شايف ان الرسالة اللي ربنا كان عاوز يبعتها كدة اتلعب فيها ومابقتش واضحة وماحدش عارفها والكل مختلف عليها واختلاف جذري بيوصل لحد الخلاف في سفك دم شخص او لا؟
-عشان كدة بقولك لازم تحكم ضميرك ومنطقك وانسانيتك وتاخد من السنة اللي يتوافق معاهم.
-طب طالما ضميري وانسانيتي ومنطقي هم اللي بيحكموا ويحددوا الصح من الغلط. ايه لازمة الكتب دي اساسا؟
-إيه؟.....

No comments:

Post a Comment